गुगलच्या दक्षिणपूर्व आशिया आणि भारतीय विभागाचे प्रमुख रंजन आनंदन म्हणतात की “भारतीय इंटरनेट वरील इंग्रजीचा प्रभाव संपुष्टात आला आहे. भारतात केवळ वीस कोटी लोक इंग्रजी लिहू, वाचू शकतात. हे वीस कोटी लोक आधीपासूनच इंटरनेट वर आहेत. नवीनच इंटरनेट वापरायला सुरु करणाऱ्यांपैकी ९० टक्के लोक त्यांच्या भाषेतील ऑनलाईन कॉन्टेन्ट वाचायला पहिली पसंती देतात” आज आपण फेसबुक आणि व्हाट्सअप वर होणारी संदेशांची देवाणघेवाण पाहिली तर रंजन आनंदन यांच्या या विधानाचा प्रत्यय येईल. मागील काही वर्षात स्मार्ट फोन्सच्या कमी होत असलेल्या किमती, भारतीय भाषांसाठी खास डिझाईन केलेली त्यातील फिचर्स आणि पूर्वीच्या तुलनेने अतिशय स्वस्त दरात उपलब्ध झालेली इंटरनेट सेवा यामुळे समाजातल्या सर्वात खालच्या स्तरापर्यंत इंटरनेटने शिरकाव केला आहे. स्वतःचे विचार व्यक्त करण्यासाठी आज प्रत्येकाला सोशल मीडियाचे व्यासपीठ मिळाले आहे. आजवर दुसऱ्यांनी लिहिलेले फक्त वाचणारे आता लिहिते झाले आहेत. याचा परिणाम म्हणून की काय लोकांच्या स्वभाषेविषयी असलेली अस्मितासुद्धा यामुळे पुन्हा जागी झाली आहे. त्यामुळे साहजिकच इंटरनेटवर स्वतःच्या भाषेत लिहायला आणि वाचायला लोक पहिली पसंती देत आहेत.